Gisugdan na sa Sandiganbayan 6th Division ang pagdungog sa petisyon para sa piyansa sa siyam ka mga akusado nga nalambigit sa giingong maanomalyang flood control project sa Oriental Mindoro. Ang maong bail hearing naggikan sa kasong malversation of public funds through falsification of public documents may kalabotan sa P289-milyon nga dike project sa maong lalawigan.
Lakip sa mga akusado mao ang mga opisyal sa DPWH ug mga representante sa Sunwest Incorporated. Sa gihimo nga pagdungog, gipresentar ni Atty. RJ Bernal ang mga dokumento sa Sunwest Incorporated, sama sa Articles of Incorporation ug General Information Sheets gikan sa 1997 hangtod 2024, aron pamatud-an ang pagkalehitimo sa maong kompanya.
Samtang padayon pa ang pagpaminaw sa kaso, ang korte nagtakda og dugang mga petsa para sa pagpadayon sa hearing karong Enero 12 hangtod Enero 15, 2026.
Kahinumduman nga ang uban pang mga kauban nga akusado, lakip na ang kanhi representante nga si Zaldy Co, gideklara na sa korte nga mga “fugitives from justice” human sa pakyas na pag-atubang sa mga otoridad.