Nakasinati ang mga motorista og mas ubos nga presyo sa lana karong adlawa human sa duha ka sunod-sunod nga semana sa pagsaka sa presyo. Gipaabot sa nagkadaiyang kompanya sa lana nga nagsugod sila og rollback sa presyo sugod sa karong Martes, Mayo 6.
Sa advisory, mikunhod ang presyo kada litro sa gasolina og P0.55, diesel og P0.65, ug kerosene og P0.90. Ang maong mga pag-usab sa presyo magsugod sa alas 6 sa buntag sa Mayo 6 para sa tanang kompanya gawas sa Cleanfuel nga magsugod alas 8:01 sa buntag.
Sumala sa Department of Energy-Oil Industry Management Bureau nga gipaabot na gyud ang maong pag-rollback tungod sa kahadlok sa sobra nga suplay sa kalibutanong merkado ug posible nga epekto sa mga polisiya sa taripa sa US sa tibuok ekonomiya ug konsumo sa lana.