Patay ang usa ka 35 anyos nga babaye human nabanggaan sa usa ka utility van samtang nagmaneho ug motorsiklo sa P1, Brgy. San Isidro, lungsod sa Talakag lalawigan sa Bukidnon.
Base sa inisyal nga imbestigasyon sa Talakag Municipal Police Station, ang motorsiklo ug ang van nga gimaneho sa usa ka 45 anyos nga lalaki, nagpadulong sa susamang direksyon sa dihang miabot sa dapit sa insidente diin gituohan nga misuway ug liko sa to o nga bahin ang motorsiklo aron mosulod sa Dole Fertilizing area.
Apan tungod sa kakusog sa dagan sa van wala niini nabantayan ang pagliko sa motorsiklo diin misulay matud pa ug preno ang driver sa van apan tungod sa kadool sa distansya nabangga kini. Gumikan sa kakusog sa impact, nawalaan ug kontrol ang motorsiklo ug natumba kauban ang babayeng driber.
Gidala gilayon sa balay tambalanan ang biktima apan gideklarar kini nga dead on arrival sa doktor nga miatiman kaniya.Nahitabo ang aksidente pasado alas 3:30 sa hapon niadtong Nobyembre 15, 2025.
Samtang ang drayber sa van ug ang duha ka sakyanan gidala sa Talakag MPS alang sa hustong disposisyon ug padayong imbestigasyon. Gisulayan pa ug kutay sa Bombo Radyo ang linya sa kapulisan apan pakyas nga makontak ang linya niini.