Gipunto ni Bicol Saro Party-list Representative Terry Ridon nga walay lugar ang mga “hyperbole” ug “figures of speech” sa paglatid sa mga patakaran, labi na kon kini gikan sa pinakataas nga lider sa nasud.
Kini ang tubag sa mambabaload, nga abogado usab, sa pangutana sa usa ka press briefing, bahin sa iyang panan-aw kung magpadayon ba sa full trial ang kaso batok kang kanhing Pangulong Rodrigo Duterte sa International Criminal Court (ICC).
Gipasabot ni Ridon nga ang aktwal nga gisulti sa mikropono o sa usa ka pampublikong kapulungan dili angay isipon nga kataw-anan, labi na kon kini usa ka pagpanghulga batok sa mga tawo.
Gipahimangnoan usab sa mambabalaod ang mga taas nga opisyal sa gobyerno nga dili angay ikomedya ang ilang mga gisulti, gumikan kini ginapaminaw ug gituohan sa publiko, dili lang sa ordinaryong mga tawo apan lakip na usab ang mga nagpatuman sa balaod.