Giduso ni House Committee on Justice Chair ug Batangas Representative Gerville Luistro nga kinahanglan ipadayon ang impeachment proceedings batok kang Vice President Sara Duterte bisan pa man kon mobiya kini sa puwesto.
Sumala ni Luistro, dili awtomatikong mohunong ang proseso sa impeachment bisan mag-resign ang usa ka opisyal, gumikan adunay duha ka posible nga silot kung makonbikto: ang pagtangtang sa puwesto ug ang permanenteng diskwalipikasyon sa paghawid og bisan unsang posisyon sa gobyerno.
Bisan pa man kon mawagtangan og kahulugan ang removal kung mag-resign na ang opisyal, gipunting niini nga importante gihapon nga mahatagan og desisyon kung ang maong opisyal angay bang i-disqualify sa umaabot.
Gipahayag usab ni Luistro nga ang proseso kinahanglan modayon hangtod sa paglitis sa Senado ug pagpagawas sa pinal nga hukom kung adunay sala o wala.
Una na usab nga nakita sa House Committee on Justice nga adunay igong basehan aron ipadayon ang pagdungog sa nahibiling impeachment complaints batok kang Duterte, nga posibleng mosangko sa Senado alang sa trial.