Gikasuhan sa Criminal Investigation and Detection Group (CIDG) sa Philippine National Police (PNP) si Cavite Representative Kiko Barzaga tungod sa kasong sedition ug inciting to rebellion.
Matod ni CIDG Director Maj. Gen. Robert Alexander Morico II, gipasaka ang kaso sa Quezon City Prosecutor’s Office may kalabotan sa kalihukan sa “Trillion Peso March” nga nahitabo niadtong Septiyembre 21. Wala na mopadayag og dugang detalye si Morico aron dili maapektuhan ang imbestigasyon sa piskalya.
Sa iyang social media post, gipakita ni Barzaga ang subpoena nga nagpasangyaw nga kinahanglan siyang motungha sa Quezon City Prosecutor’s Office sa Nobyembre 17 ug 25 alang sa preliminary investigation.
Kahinumdoman nga makadaghang higayon nga nagpost si Barzaga batok kang Pangulo Ferdinand Marcos Jr., nga iyang giakusahan sa korapsyon. Siya usab ang giingong nanguna sa pagtawag sa mga tawo aron magprotesta sa atubangan sa Forbes Park, Makati City, diin nagpuyo sila Leyte Rep. Martin Romualdez ug ang mikanaog nga si Rep. Zaldy Co.