Nagpadayag si Negros Oriental Representative Janice Degamo nga adunay igong basehan ang gipagawas nga video sa giingong pagpanghulga ni Vice President Sara Duterte aron mapasaka ang usa ka impeachment complaint.
Matod pa niini, dili angay balewalaon ang susama nga mga pamahayag tungod kay nagdala kini og tinuod nga hulga o peligro.
Isip biyuda sa gipatay nga gobernador—partikular na ang nahitabo sa bana niini nga si Roel Degamo— gihatagan og gibug-aton niini nga ang mga hulga mahimong mosangpot sa aktuwal nga panghitabo.
Tungod niini, nagtuo kini nga tin-aw nga usa ka “misconduct” ang gihimo sa Bise Presidente ug angay kining ipailalom sa proseso sa impeachment.
Samtang, susama usab niini ang baruganan ni Representative Leila de Lima ug sa mga miyembro sa Makabayan Block tungod sa giingong sensitibo ang mga pulong nga giluwat sa Bise Presidente.