Ipadayon gihapon ang diplomatic engagement tali sa Department of Foreign Affairs (DFA) sa Pilipinas ug sa China, bisan pa sa nagkagrabe nga panagbangi tali sa mga opisyal sa Pilipinas ug sa Chinese Embassy sa Maynila bahin sa isyu sa West Philippine Sea.
Sa panayam sa Bombo Radyo, miingon si Mamamayang Liberal Party-list Representative Leila De Lima nga dili angay maapektuhan ang katungdanan sa DFA sa pagduso sa foreign policy sa kasamtangang administrasyon bisan pa sa word war tali sa Chinese Embassy ug mga Philippine officials.
Matud pa ni De Lima , katungdanan sa ahensya ang patigayonon ang diyalogo pinaagi sa diplomatic channels aron masulbad ang bisan unsang panagbangi.
Apan, kinahanglan usab nga barugan sa DFA ang pagbastos ug pagbatikos nga gihimo sa embahada batok sa mga opisyal sa Pilipinas.
Kauban niini, nanawagan si De Lima nga ang DFA maghimo og mas lig-on ug bug-at nga lakang batok sa China.
Gisugyot sa mambabalaod, nga kaniadto nagsilbi usab nga Secretary of Justice, ang posibilidad sa tawagon ang Chinese Ambassador sa Pilipinas aron pagpasabot sa iyang embahada bahin sa pagpangbatikos sa mga opisyal sa nasud.
Matud niya, gihimo na kini sa gobyerno sa China sa Philippine Ambassador sa China, ug mahimo usab kini buhaton sa DFA sa diplomatikong pamaagi.