Gisuspinde og usab sa House of Representatives sulod sa 60 ka adlaw si Cavite 4th District Rep. Kiko Barzaga tungod sa padayong paglapas sa mga lagda sa institusyon.
Sa gipahigayon nga plenary session, nakakuha og 238 ka botong pabor ang mosyon sa pagpahamtang og silot, samtang 10 ang nibalibad ug siyam ang ni-abstain.Ang maong desisyon subay sa rekomendasyon sa House Committee on Ethics and Privileges nga gidumala ni 4Ps Party-list Rep. JC Abalos.
Base sa report sa komite, napamatud-an nga gilapas ni Barzaga ang mga kondisyon sa iyang unang suspensyon nga nagsugod niadtong Disyembre 1, 2025 hangtod Enero 30, 2026.
Lakip sa mga rason nga gihatag sa komite mao ang “dili angay nga pamatasan” sa kongresista ug ang padayon niining pag-post sa social media og mga mensahe nga giingong makadaot sa dungog sa iyang mga kauban sa Kamara ug sa tibuok institusyon.
Tungod sa maong hukom, magpabiling suspendido ang kongresista ug dili makahimo sa iyang mga opisyal nga katungdanan sulod sa duha ka bulan.