Posible matud pa nga madismiss ang reklamo batok kang Senador Ronald “Bato” dela Rosa nga adunay kalabotan sa gikaingong “no work, no pay policy,” sumala ni Sen. JV Ejercito nga nagserbisyo isip chair sa Senate Committee on Ethics and Privileges.
Matud ni Ejercito, kung dunggon karon ang maong reklamo, klaro nga mahimong ibasura kini gumikan wala kini sakop o basehan sa kasamtangang rules sa Senado.
Gipatin-aw niini, nga wala’y probisyon sa Senate rules nga nag-implementar sa “no work, no pay” batok sa mga senador, hinungdan kulang sa legal nga basehan ang maong reklamo.
Gidugang pa sa senador nga bisan pa ug ipadayon ang pagdungog, dili gihapon kini molampos tungod wala’y klarong regulasyon nga mosuporta sa gipangayo nga silot.
Tungod niini, miluwat ang Senador nga kinahanglan pa usbon o amyendahan ang Senate rules kung gusto nga mahimong valid ang maong matang sa reklamo.
Sa kasamtangan, nagpasabot kini nga ang kaso batok ni Dela Rosa wala pa’y lig-on nga pundasyon sulod sa balaod sa Senado.