Gipasigarbo ni Liliana Villarreal, ang Artemis II Landing and Recovery Director, ang luwas ug sistematikong pag-recover sa upat ka mga crew sa Artemis II human sa malampusong splashdown sa kadagatan duol sa San Diego, California niadtong Sabado.
Matud pa kaniya, ang mabinantayong pagpangandam, balik-balik nga rehearsals, ug mga contingency plan ang nahimong yawe aron maseguro ang hapsay nga operasyon.
Human sa siyam ka adlaw nga misyon libot sa bulan, luwas nga nakabalik silang Reid Wiseman, Victor Glover, Christina Koch, ug Jeremy Hansen, kinsa daling gipaubos sa medical check-up ug nakumpirmang anaa sa maayong kahimtang.
Dugang pa ni Villarreal, tumong sa ilang operasyon nga dili lang ang luwas nga pagkuha sa crew kondili apil na ang paspas nga pag-secure sa Orion spacecraft alang sa pagsusi ug data collection.
Ang Artemis II nakatala og bag-ong rekord isip pinakalayong distansya nga naabot sa tawo gikan sa kalibutan, nga niabot sa kapin 400,000 kilometros, ug nakahatag og mga hulagway gikan sa lunar orbit lakip na ang talan-awon sa “Earthset.”
Ang malampusong recovery giisip nga usa ka mahinungdanong lakang paingon sa Artemis III, nga gilaumang magdala og mga astronaut ngadto sa ibabaw mismo sa bulan sa unang higayon sukad niadtong 1972.