Gipusil ang sikat nga American rapper ug kanhi miyembro sa grupong Migos nga si Offset (Kiari Cephus) gawas sa usa ka sikat nga hotel ug casino sa Hollywood, Florida, niadtong Lunes sa gabii (Martes sa Pilipinas).
Sumala sa report, nahitabo ang pagpamusil sa valet area sa Seminole Hard Rock Hotel & Casino. Dali nga gidala ang 34-anyos nga rapper sa Memorial Regional Hospital human makaangkon og mga samad pinusilan nga swerte kay wala ra makabsan sa iyang kinabuhi.
Sa pinakabag-o nga pamahayag gikan sa iyang representante, giingong anaa na sa “stable condition” o luwas na nga kahimtang si Offset apan padayon pa kining gi-obserbahan sa mga doktor.
Gitanggong na sa mga otoridad ang duha ka indibidwal nga gidudahang may kalabutan sa insidente. Usa sa mga gihisgutan sa mga report mao ang rapper usab nga si Lil Tjay, kinsa giingong nadakpan human sa usa ka away nga maoy gituohang sinugdanan sa kagubot.
Kahinumduman nga kaniadtong 2022, ang ig-agaw ni Offset ug kauban sa Migos nga si Takeoff ang namatay usab human pusila didto sa Houston, Texas. Si Offset nailhan usab nga kanhi bana sa sikat nga rapper nga si Cardi B.