Gipahayag sa lokal nga panggamahanan sa Quezon, Bukidnon nga normal ug maayo ang kahimtang sa lugar bisan pa sa padayon nga pagmonitor sa posibleng epekto sa Bagyong Bashang.
Sa pakighinabi sa Bombo Radyo Malaybalay ni Public Information Officer Forts Cabarde, walay kusog nga ulan o hangin nga natala, ug ang ulan hinay lamang ug dili makabalaka.
Bisan pa nga layo pa ang sentro sa bagyo, naka-alerto gihapon ang mga rescue team, engineering team, BFP, ug municipal health personnel alang sa posibleng emerhensiya, ilabi na sa mga landslide-prone nga barangay sama sa Magsaysay, Lipayon, Mahayag, San Roque, Linabo, Lipa, ug Kawayan.
Wala usab nay report sa pagsaka sa tubig sa suba o pagdahilig sa yuta.
Gisiguro usab sa LGU nga abli ug hapsay ang dagan sa trapiko sa Palacapao Overlook Road, nga miagi na og clearing human sa landslide niadtong Oktubre.
Padayon ang koordinasyon sa barangay ug MDRRMO aron masiguro ang kaluwasan sa mga residente samtang naghulat sa sunod nga weather updates gikan sa PAGASA.