Gipahinumduman sa katawhan ang kahinungdanon sa Adlaw sa Kalag ug Santos atol sa pagsaulog, diin gipasabot sa usa ka opisyal sa Malaybalay nga dili lamang kini usa ka relihiyosong kalihukan apan usa usab ka kultura sa matag Pilipino.
Gipasundayag ni Atty. Hollis Monsanto, 2nd District Board Member sa Bukidnon sa pakighinabi sa Bombo Radyo Malaybalay nga ang pagbisita sa lubnganan, paghalad og mga bulak lakip sa mga kandila usa ka paagi sa pagpanghinumdum sa mga hinigugma nga mitaliwan na.
Gibutyag usab sa opisyal nga personal siyang mibisita sa Pryce Gardens aron sa paghalad ug pag-ampo alang sa iyang inahan ug apo nga mipanaw na. Matod pa sa opisyal, kini usa ka tradisyon nga nagpalig-on sa panaghiusa sa pamilya ug usa ka prebilehiyo nga makapahimamat pag-usab sa mga paryente.
Sa katapusan, mipahimangno ang maong opisyal sa publiko nga magmatngon sa pagsaulog, likayan ang pag-inom sa makahubog nga ilimnon, ug ipatuman ang husto nga oras sa pagbisita aron malikayan ang kalisod ug katalagman.