Gikonsidera sa Philippine National Police (PNP) nga “generally peaceful” ang gihimong “Trillion Peso March” kaghapong adlawa, Setyembre 21 ning kasamtanagang tuig.
Matud ni Acting PNP Chief Lt. Gen. Jose Melencio Nartatez Jr., ang mga natigayong kagubot matawag lamang nga mga ‘isolated case’.
Subay niini, giidayeg usab sa opisyal ang kapulisan nga naghatag og kasigurohan aron mapabilin ang kalinaw atol sa natigayong rally.
Base sa pagbana-bana sa PNP, mosaka og 61,605 ka protesters ang misalmot sa tibuok nasud diin 33,720 niini anaa sa Metro Manila ug 27,885 ang gikan sa lain-laing rehiyon.
Kapin sa 50,000 ka pulis ang gipakatap diin 29,300 niini gibutang sa Metro Manila isip kabahin sa Civil Disturbance Management (CDM) Units.
Lakip sa mga natalang kagubot mao ang pagpangbato sa kapulisan ug pagsunog sa usa ka trailer truck nga duol sa Ayala Bridge sa Maynila. Naatol usab ang pag-aresto sa 49 ka indibidwal lakip ang 13 ka menor de edad tungod sa kaso sa illegal assembly, direct assault, malicious mischief ug resistance to authorities.
Gibana-banaang anaa sa 70 ka miyembro sa Manila Police District ang nasamdan samtang nagpakgang sa mga nagpasiugda sa kagubot.
Gipaambit usab ni PMaj. Jeniffer ganaban, hepe sa Public Information office sa Quezon City police District, nga malampuson ang kapulisan sa pagpugong ug pagbantay sa mga raliyestang grupo aron magpabilin ang kalinaw pinaagi sa kooperasyon sa mga otoridad.
Apan kabahin niini, usa ka aala pa mailhing lalaki ang gideklarar nga namatay sa pagpanunggab nga may kalabutan sa dakong demonstrasyon nga natigayon kagahapon sa pipila ka bahin sa nasud, ilabina na sa Metro Manila.
Kini base sa impormasyon nga gipagawas sa Department of Health (DOH). Sa pagkakaron, padayon pang gisuta sa mga otoridad ang pagkatawo sa biktima samtang nagpadayon usab ang imbestigasyon sa insidente.