Gipahibalo sa Highway Patrol Group–Bukidnon nga nahimong baligyaanan o disposal area ang probinsya sa Bukidnon alang sa mga nakarnap nga sakyanan gikan sa kaulohan, tungod kay nakita sa mga organized crime groups nga kwartahan ug kompetitibo ang Bukidnon.
Sa pakighinabi sa Bombo Radyo Malaybalay, gipahibalo ni Highway Patrol Group–Bukidnon Chief Col. Surki Sereñas nga ilang ginabantayan karon ang usa ka grupo nga posibleng nalambigit sa pagpasulod ug pagpamaligya sa carnapped vehicles sa probinsya, bisan pa man premature pa ang ilang imbestigasyon.
Gipasabot ni Sereñas nga ang Bukidnon dili mao ang lugar nga gigikanan sa krimen, kondili sa maong probinsya kini ipasulod ug ipamaligya, busa nagpalig-on sila sa kampanya aron mapahibalo ang publiko sa risgo sa pagpalit ug second-hand vehicles.
Gidugang sa opisyal nga kinahanglan ang katawhan nga magmatngon, mag double check sa dokumento ug ilahon sa ang sakyanan aron dili mabiktima sa scammer ug organized crime groups.
Giklaro usab ni Sereñas nga bisan gikuhaan sila og deputation sa LTO karong tuiga, nagpadayon ang trabaho sa HPG ubos sa ilang primary functions nga mao ang anti-carnapping operations, highway crime response, traffic law enforcement, ug road safety.