Gipasalig sa kagamhanang probinsyal sa Bukidnon nga anaa na sa 85% ang preparasyon alang sa dungan nga aktibidad sa Northern Mindanao Regional Athletic Association (NMRAA) ug sa tinuig nga Kaamulan karong Marso 18 hangtod 25.
Sa eksclusibong pakighinabi sa Bombo Radyo kay Jun Cruz, Provincial Chair for the Events Committee, nga human sa pito ka bulan nga koordinasyon sa DepEd ug uban pang ahensya andam na ang probinsya sa pagdawat sa mga atleta gikan sa tibuok rehiyon 10.
Sa aspeto sa pasilidad, kompleto na ang sports complex ug ginasulbad na ang suplay sa tubig alang sa swimming pool.
Nakig-alayon na ang probinsya sa water district ug nagmando sa pagbutang og dugang water tanks sa matag billeting school isip backup sa suplay sa tubig.
Bahin sa seguridad, gipasalig ni Cruz nga duna nay lig-on nga security plan ang PNP ug BFP nga gihan-ay pa sukad sa miaging tuig aron masiguro ang peace and order sa tibuok gidugayon sa mga kalihokan.