Giandam na sa Police Regional Office-10 ang Oplan Undas 2025 aron masiguro ang kalinaw ug kahapsay sa umaabot nga kalag-kalag sa mga sementeryo ug terminal sa rehiyon.
Matud ni Police Major Joann Navarro, tigpamaba sa PRO-10, nga tutokan sa kapulisan ang mga lugar nga gitawag nga “places of convergence” sama sa mga sementeryo, simbahan, terminal sa bus, pantalan, ug merkado sa panahon sa kalag-kalag.
Dugang pa ni PMaj. Navarro, nga aduna usab og Police Assistance Desks sa matag dapit aron dali mahatagan og tabang ang katawhan nga manginahanglan, samtang aduna usab dugang puwersa sa mga major thoroughfares aron malikayan ang kasamok sa trapiko ug kalit nga insidente.
Gipangusgan usab ni PMaj. Navarro, nga adunay koordinasyon tali sa PNP, local government units (LGUs), ug uban pang law enforcement agencies, lakip na ang mga force multipliers nga motabang sa pagbantay sa seguridad panahon sa kalag-kalag.