Gisiguro sa Police Regional Office-10 (PRO-10) nga walay nasuta nga aktibong criminal gangs sulod sa Region 10, bisan pa sa pagdagsa sa mga molakaw ug mopauli sa mga pantalan, airport, ug terminal karong holiday season.
Sa pakighinabi sa Bombo Radyo Malaybalay kay PMaj. Joann G. Navarro, tigpamaba sa PRO-10, na wala pay kumpirmadong presensya sa criminal gangs sa rehiyon, apan padayon ang hugot nga pagbantay aron malikayan ang posibleng pagsulod sa mga grupo gikan sa ubang rehiyon. Gipahayag niini nga ginabuhat kini pinaagi sa proactive security operations, koordinasyon, ug intelligence fusion uban sa AFP ug ubang ahensya sa gobyerno.
Dakong tabang usab, matud niya, ang pagbisita sa PAOCC Executive Director Undersecretary Benjamin Acorda Jr. atol sa Regional Law Enforcement Coordinating Committee meeting, nga nagpakita og lig-ong suporta gikan sa nasyonal nga lebel.
Samtang sa pikas bahin may kalabutan sa insurhensya, gipahayag ni Navarro nga kontrolado na ang kahimtangan sa rehiyon ug adunay mga probinsya nga gideklarar nang insurgency-free, lakip ang Misamis Occidental, Agusan del Norte, ug Camiguin.
Isip kabahin sa NTF-ELCAC, padayon ang suporta sa PNP sa kampanya sa AFP, ug gipasiguro niya nga ang nahibiling hulga mga ginagmay na lamang.
Gipasiguro sa PRO-10 nga walay angay kabalak-an ang publiko, samtang nagpadayon ang paningkamot sa PNP ug AFP aron makab-ot ang tumong nga hingpit nga insurgency-free ang Rehiyon 10.