Subling napakyas ang Primewater sa pagtubag sa showcause order human sa gilugway nga panahon aron muhatag og katin-awan ug magsumite sa mga gikinahanglang dokumento ngadto sa Malaybalay City Water District (MCWD).
Sumala ni Engr. Nolito S. Binahon, ang General Manager sa MCWD, gihatagan nila og 45 ka adlaw ang Primewater aron makig-alayon sa ilang buhatan.
Tumong niini nga makwenta ang tanang infrastructure, investments, ug uban pang kabtangan nga napundar sa maong kompanya sa Malaybalay alang sa posibleng turnover sa serbisyo.
Apan, hangtud karon, wala gihapoy nadawat nga opisyal nga komunikasyon ang MCWD gikan sa Primewater.
Gikinahanglan ang maong mga dokumento aron legal nga ma-acquire sa MCWD ang mga kabtangan ug masukod usab ang kinatibuk-ang kantidad sa mga nahimong danyos o damages nga nahitabo sulod sa panahon sa ilang operasyon.
Gidugang pa niini nga posibleng kuhaon ang operasyon sa pwersahang paagi apan gissugyot niini nga buhaton ang tanan ug magsubay sa legal nga proseso aron dili mabulilyaso.