Mamahimong maapektuhan ang pag-renew sa kontrata sa Prime Water sa syudad sa Malaybalay sa umaabot nga tuig kung magpadayon ang palpak sa serbisyo niini sa mga konsumidor.
Sa eksklusibong pakighinabi sa Bombo Radyo Malaybalay kay Salvador Yacapin, Head Officer IV sa Licensing Office nga nagpaabot pa sila sa notice of violation nga ipahamtang batok sa Prime Water.
Matud pa ni Yacapin, kung makadawat na sila og opisyal nga kopya sa reklamo, magpahigayon ang ilang opisina og imbestigasyon aron ma probaran kung adunay kalapasan sa balaod, ilabi na sa General Welfare Act ug kung tinuod bang wala nakahatag og maayong serbisyo sa katawhan ang kompanya sa katawhan.
Samtang, sa laing bahin, unom ka mga establisimyento sa syudad ang naisyuhan na og notice of compliance ug sunod semana maglibot ang ilang opisina aron sa pag-inspeksyon sa mga nagkalain laing negosyo ilalom sa programang Business One Stop Shop kon (BOSS) 2026.