Giatubang karon sa PrimeWater Infrastructure Corporation ang duha ka dagkong tulobagon, lakip na ang gipagawas nga pre-termination sa Joint Venture Agreement tali sa Malaybalay City Water District ug ang show cause order nga gi-isyu sa lokal nga kagamhanan sa syudad sa Malaybalay.
Sa eksklusibong pakighinabi sa Bombo Radyo Malaybalay kang City Mayor Jay Warren Pabillaran, gibutyag niini nga gihatagan pa sa provisional business permit ang PrimeWater, apan kung mapakyas kini sa hustong pagtubag sa show cause order, marevoked gilayon ang maong provisional permit.
Gipasabot sa Mayor nga ang show cause order gipagawas tungod sa kapakyasan sa PrimeWater sa paghatag og episyente, kasaligan ug igo nga suplay sa tubig ngadto sa mga konsumidor sa syudad.
Giklaro usab niini, nga lahi ug separado nga proseso ang pag-atubang sa show cause order nga gipangulohan sa lokal nga kagamhanan ug ang pre-termination sa joint venture agreement nga gipagwas sa Malaybalay City Water District.