Gipahimutang ang kasiguruhan sa presyohan sa Noche Buena sa tibuok Bukidnon human masuta nga walay timailhan sa pagsaka sa presyo bisan padulong na ang Pasko. Sa pakighinabi sa Bombo Radyo Malaybalay, gipadayag ni Annabelle B. Encabo, OIC sa DTI-Bukidnon, nga nagpabiling stable ang presyo sa mga produkto sa lalawigan, ilabi na ang mga panghanda sa Noche Buena.
Gipasabot niya nga kung aduna man gani’y gamayng pagtaas, kasagaran kini mahitabo sa gawas sa dakbayan kung diin ang mga negosyante mopalit og produkto nga ipamaligya sa layong lugar, nga normal nga mosangpot sa dugang presyuhan tungod sa negosyo nga pamaagi.
Giklaro usab ni Encabo ang isyu sa “₱500 Noche Buena,” nga matod pa kaniya tulo na ka tuig ang nilabay ang maong isyu sa 500 pesos para sa noche Buena. Gipasabot niya nga giya lamang kini sa unsay angay ipalit depende sa budget ug desisyon sa matag pamilya..
Kung bongga ang handaan, dili gyud makasigo ang ₱500, apan kung simple ug praktikal ang pagpamalit, posible kining makahatag og igo nga Noche Buena.
Samtang, gipahibalo sa DTI-Bukidnon nga anaa sa ilang website ug social media ang Noche Buena Price Guide aron matabangan ang publiko sa husto ug limpyo nga pagpamalit.