Gilauman sa Bangko Sentral ng Pilipinas (BSP) ang posibleng pagsaka sa dagan sa presyo sa mga paliton o inflation alang sa bulan sa Pebrero.
Sumala sa pamahayag sa BSP, ang nag-unang hinungdan sa maong pagsaka mao ang mas mahal nga presyo sa bugas, isda, ug lana.
Gawas niini, ang taas nga singil sa kuryente sa Metro Manila usa usab sa nakitang rason nga makapapataas sa gasto sa mga konsumidor.
Apan luyo niini, gipahayag sa central bank nga mahimo kining mabalanse tungod sa pag-ubos sa presyo sa mga utanon, prutas, ug karne. Kahinumduman nga niadtong Enero, ang implasyon anaa lang sa 2 porsyento.
Matud pa sa mga ekonomista, gilauman nga mas mopaspas ang pagsaka sa presyo karong tuiga tungod sa gitawag nga “base effects”.
Kini tungod kay mas ubos ang natala nga inflation rates niadtong tuig 2025, hinungdan nga mas taas tan-awon ang mga numero sa presyo karong tuig 2026.