Lauman na sab ang bagong hugna sa pagkunhod sa presyo sa lana sunod semana human sa kasamtangang kalihukan sa presyo sa krudo sa kalibutanang merkado.
Base sa inisyal nga impormasyon gikan sa mga tinubdan sa industriya sa lana, posibleng mukunhod ang presyo sa diesel og P1.70 hangtod P1.90 kada litro, samtang ang gasolina mahimong muubos og P4.70 hangtod P4.90 kada litro.
Gisiguro sa mga eksperto nga ang maong rollback resulta sa nagpadayon nga paghinay sa presyo sa krudo sa world market, nga nakaapekto sa West Texas Intermediate (WTI) ug Brent crude prices.
Usa usab sa gilangkat nga rason mao ang pagtaas sa global supply ug pagkunhod sa demand sa lana, ilabina karong panahona.Gikatakdang ipahibalo sa Lunes ang opisyal nga adjustment sa presyo ug ipatuman kini sa alas 6 sa buntag sa Martes.
Ang maong rollback gikalipay sa daghang motorista ug transport groups, nga niingon nga kini dakong tabang sa ilang adlaw-adlaw nga operasyon human sa sunod-sunod nga pagsaka sa presyo sa miaging mga semana.
Magpadayon ang Department of Energy (DOE) sa pagbantay sa kalihukan sa merkado aron masiguro ang patas nga presyo alang sa tanang konsumidor.