Gilaumang moubos ang presyo sa galunggong sa mga lokal nga merkado karong umaabot nga Pebrero 2026 kana ang gibutyag sa Bureau of Fisheries and Aquatic Resources kon (BFAR).
Kini human sa tulo ka bulan nga pagpatuman sa closed fishing season sa kadagatan sa Palawan nga nakatakdang mahuman karong Enero 31. Ang maong lakang gihimo aron paghatag og higayon sa mga isda nga makapangitlog ug mapanalipdan ang kadagatan.
Kasamtangan, ang presyo sa galunggong sa Metro Manila anaa pa sa P180 hangtod P220 matag kilo. Apan sa banabana sa BFAR, mahimo kining moubos og P20 hangtod P40 matag kilo sa pagsulod sa bulan sa Pebrero tungod sa gipaabot nga pagsaka sa suplay.
Matud ni BFAR Spokesperson Nazario Briguera, mas modaghan ang makuha nga isda sa mosunod nga mga semana nga moresulta sa mas barato nga baligya niini sa mga palengke. Ang galunggong nagpabilin nga usa sa labing popular nga sud-an sa mga pamilyang Pilipino tungod sa barato nga presyo niini itandi sa ubang matang sa isda.