Nagpahibalo ang Department of Energy (DOE) nga posibleng moabot sa P80 kada litro ang presyo sa diesel sa sunod semana kung magpadayon ang pagsaka sa presyo sa lana sa tibuok kalibutan.
Sumala sa DOE, dako ang posibilidad sa taas-presyo kung dili ipatuman sa mga kompanya sa lana ang “staggered” o hinay-hinay nga pagtaas, ilabi na kung molungtad pa ang tensiyon sa Middle East.
Matod ni Industry Management Bureau Director Rino Abad, wala pa’y pinal nga desisyon ang mga kompanya sa lana kung unsaon niiini pagpatuman sa maong taas nga presyo.
Gipasabut usab ni Abad nga naghulat pa ang DOE ug mga oil company sa kompleto nga datos gikan sa lima ka adlaw nga trading sa international oil prices aron makadesisyon kung buhaton ba ang pagtaas sa duha o tulo ka hugna.