Gilauman nga moabot sa ₱94 hangtod ₱114 kada litro ang presyo sa diesel sa Metro Manila karong semanaha tungod sa dakong umento sa presyo sa lana.
Sumala ni Department of Energy (DOE) Usec. Sharon Garin, nagkasinabot ang mga dagkong kompanya sa lana nga bahin-bahinon ang pagpatuman sa maong pagsaka sulod sa duha hangtod tulo ka adlaw—gikan sa Marso 17 hangtod 19—aron mamenosan ang kalit nga epekto niini ngadto sa mga motorista.
Taliwala niini, gipahayag sa DOE nga gitun-an ang posibilidad sa government-to-government transactions uban sa China ug Russia aron makapalit og mas baratong krudo o mga produkto sa petrolyo.
Bisan pa man sa pagsaka sa presyo, gipaniguro sa ahensya nga igo pa ang suplay sa lana sa nasod hangtod sa katapusan sa Abril, apan dako ang posibilidad nga mas mahal na ang mosunod nga suplay alang sa bulan sa Mayo.
Tungod kay ang diesel ang nag-unang fuel nga gigamit sa mga pampublikong sakyanan ug mga cargo delivery, gilauman nga dako ang mahimong epekto niini sa pletehan, presyo sa mga paliton, ug sa kinatibuk-ang ekonomiya sa Pilipinas.