Gilauman nga mosamot pa ang pagsaka sa presyo sa mga batakang palaliton human ang padayon nga pagkaluya sa peso batok sa dolyar, diin kagahapon miabot na kini sa P60.10 sa $1, usa ka lebel nga giila nga pinakataas o “all-time low” sa kasaysayan sa nasud.
Sumala sa mga eksperto, ang maong kahimtang gipalala usab sa padayon nga pagsaka sa presyo sa produktong petrolyo sa kalibutanong merkado nga direktang nakaapekto sa importasyon ug gasto sa Pilipinas.
Matud ni Professor Emmanuel Leyco, ekonomista ug propesor sa governance ug people empowerment, mahimong adunay benepisyo ang pagtaas sa dolyar alang sa mga Overseas Filipino Workers kon OFWs tungod sa mas taas nga bili sa remittance.
Apan gipasabot niini nga limitado lamang kini ug dili maghatag ug dako ug dugay nga positibong epekto sa kinatibuk-ang ekonomiya sa nasud.
Gipasiugda usab sa ekonomista, nga mas bug-at ang negatibong epekto niini gumikan ang Pilipinas nagsalig sa daghang imported nga produkto, hinungdan dali nga mabati sa merkado ang pagtaas sa dolyar pinaagi sa mas mahal nga presyo sa mga palaliton ug importasyon.
Naglaum usab kini, nga sa umaabot nga mga semana o bulan, mobalik sa mas lig-on nga lebel ang peso aron malikayan ang dugang nga pressure sa ekonomiya ug katawhan.