Nagpabilin ang posibilidad nga moabot sa P200 ang presyo sa diesel kada litro sa Pilipinas, sumala sa Department of Energy (DOE).
Bisan pa niini, naglaum ang ahensya nga dili kini mahitabo.
Gipasabot ni Energy Secretary Sharon Garin nga dili pa klaro kung moabot ba sa ingon nga lebel ang presyo sa lana sa nasud, samtang nagpadayon ang negosasyon aron mahunong ang giyera sa Middle East.
Matud pa ni Garin, dili kontrolado sa gobyerno ang kahimtang sa kalakalan sa produktong petrolyo ug ang paglihok sa presyo niini gikan sa global market padulong sa lokal nga merkado.
Kung tan-awon ang kasaysayan, wala pa matud pa miabot sa ingon ka taas nga presyo ang lana sa Pilipinas, apan tungod sa impluwensya sa global market, daghang posibleng mahitabo sa presyo sa lana.
Dugang pa niini, dili dayon moubos ang presyo sa lana sa lokal nga merkado bisan pa og mahuman ang giyera, tungod sa permanente nga kadaot nga nahimo sa petroleum industry sa tibuok kalibutan.
Kagahapon (April 7), gipatuman sa mga petroleum companies ang ikalimang sunod-sunod nga double-digit nga pagsaka sa presyo sa mga produktong lana, hinungdan nga misaka ang price range sa diesel ngadto sa P130 hangtod P170 kada litro.