Sa usa ka wala damhang lakang taliwala sa nagkagrabe nga tensyon sa Middle East, gipahibalo ni Iranian President Masoud Pezeshkian nga undangon na sa iyang nasod ang paglunsad og mga missile attack batok sa ilang mga silingang nasod. Pinaagi sa usa ka televised address, gipasabot sa presidente nga buot nila nga ipatigbabaw ang diplomasya kaysa sa pagpakig-away aron masulbad ang mga kasungian sa rehiyon.
Dungan sa maong anunsyo, nangayo usab og pasaylo si Pezeshkian sa mga “Gulf states” ug giawhag sila nga dili magpadala sa impluwensya sa mga impluwensyadong nasod o imperyalismo. Giklaro niya nga mohunong lamang ang ilang pagpangatake kon dili usab gamiton ang mga teritoryo sa maong mga silingang nasod aron atakihon ang Iran. Kini nga kalamboan giisip nga usa ka dako nga kausaban human ang usa ka semana nga binayloay og bala tali sa Iran, Amerika, ug Israel.
Bisan pa man niining iyang pagpangayo og pasaylo sa mga silingan, mibarog gihapon ang Iran nga dili sila mosurender ngadto sa Estados Unidos. Kini human gisalikway ni Pezeshkian ang panawagan ni U.S. President Donald Trump alang sa usa ka “unconditional surrender.” Sa pagkakaron, nagpabilin ang katawhan sa pagpaniid kon hingpit ba nga matuman ang maong hunong-buto aron malikayan ang mas dako pa nga krisis sa katawhan.