Nakabalik na sa Pilipinas si Presidente Ferdinand Marcos Jr. human sa pagbisita sa US ug personal nga nakahinabi ang Presidente sa US nga si Donald Trump.
Miabot ang Presidente niadtong Miyerkules sa gabii, Hulyo 23.
Sa arrival statement sa Presidente, gipasalig niini ang mga hinabang nga ipang-apod-apod sa gobyerno alang sa mga naapektuhan sa grabeng pagbaha tungod sa mga bagyo.
Giawhag usab niini ang publiko nga naapektuhan sa pagsunod sa mando sa mga otoridad.
Gipresenta usab sa Presidente ang mga malampuson nga mga pakigpulong niini kang US President Trump.
Gihisgutan sa maong pakighinabi ang daghang mga isyu sa seguridad, mahitungod sa ekonomiya, ug defense cooperation.
Gipasigarbo usab ni Marcos nga nakakolekta kini og kapin sa $21 bilyon nga investment pledges gikan sa mga business leaders ug top executives sa nagkalain-laing kompanya sa US nga iyang nakahimamat.
Giimbitar usab ni Marcos si Trump sa pagbisita sa nasud ug pagtambong sa Association of Southeast Asian Nations (ASEAN) meeting sa 2026, diin ang Pilipinas mao ang mahimong host.