Nagpasalig ang 4th Infantry Division, nga walay angay kabalak-an ang publiko sa presensya sa mga miyembro sa United States Marine Corps sa Cagayan de Oro tungod kay kabahin lamang kini sa Balikatan Exercises ug walay kalabutan sa kasamtangang tensyon sa Middle East.
Sa pakighinabi sa Bombo Radyo Malaybalay kay Major General Michele Anayron Jr. Commander sa 4th Infantry Division Philippine Army, nga ang mga miyembro sa United States Marine Corps miabot sa Cagayan de Oro City aron magpahigayon og simulation ug logistical training nga kabahin sa Balikatan Exercises nga ginabuhat matag tuig sa Pilipinas.
Gipasabot sa heneral nga ang aktibidad naka-focus sa pagpraktis sa pag-load ug unload sa military equipment ug ubang operational scenarios. Gilauman nga mokabat sa 70 hangtod 80 ka personnel ang moapil sa maong training nga molungtad og usa hangtod duha ka semana.Dugang pa niya nga kabahin kini sa pagbalhin sa papel sa Armed Forces of the Philippines gikan sa internal security operations padulong sa external defense, busa gikinahanglan nga ma-expose usab ang mga tropa sa Mindanao sa joint exercises uban sa mga kaalyadong nasud sama sa United States, Australia ug Japan.
Gipadayag ni Anayron nga ang presensya sa mga kaalyadong pwersa sa maong exercises nagpakita sa panghiusa sa ubang nasud nga motabang sa Pilipinas kon adunay hulga sa seguridad sa nasud.