Nanawagan si Presidente Ferdinand Marcos Jr., sa tanang Pilipino nga ikinabuhi ang prinsipyo sa pagkamabination, disiplina, ug panaghiusa sa pagsaulog sa Eid al-Fitr, nga nagtimaan sa pagtapos sa balaang bulan sa Ramadan.
Sa opisyal nga mensahe, gipasiugda sa Presidente nga ang Ramadan maoy panahon sa pagpalig-on sa pagtuo, pagpaubos sa kaugalingon, ug pag-amuma sa espirituhanong kinabuhi.
Matud niini, nga ang tinuod nga kalipay ug kahulogan sa selebrasyon naggikan sa sakripisyo, disiplina, ug pagtuo, nga kinahanglang magpadayon bisan human sa pagpuasa.
Gihangyo usab ni Pres. Marcos Jr., ang publiko nga ipadayon ang mga maayong buhat nga nakab-ot sa panahon sa Ramadan, hilabi na ang pagpakita sa pagtahod, pagtinabangay, ug pagpalig-on sa panaghiusa bisan pa sa mga kalainan sa relihiyon ug kultura.
Dugang pa, ang Presidente naglaum nga ang Eid makahatag ug kahupayan sa mga nag-antos sa kakabos ug makahatag ug bag-ong kusog sa mga nagserbisyo sa katawhan.
Gipasabot usab niini, nga ang panaghiusa ug panagsinabtanay maoy yawe sa pagpatunhay sa kalinaw ug kalamboan sa nasud.
Samtang nagselebrar sa maong okasyon, gipalig-on usab sa administrasyon ang panawagan sa pagtukod og lig-on ug inklusibo nga “Bag-ong Pilipinas,” diin ang gihatagan og importansya ang dignidad sa matag Pilipino, ug nga ang kalinaw mapadayon pinaagi sa hustisya ug pagrespeto sa usag usa.