Gibutyag ni Senate President Vicente “Tito” Sotto III karong Martes, Pebrero 3, nga gitanyagan matud pa sa minority bloc si Senator Loren Legarda nga mahimong bag-ong pangulo sa Senado.
Sa usa ka interview, giingon ni Sotto nga mismo si Legarda ang nagpahibalo kaniya mahitungod sa maong tanyag niadtong miaging adlaw, taliwala sa mga hungihong nga adunay mahitabong “coup” o pag-ilis sa liderato sa Mataas nga Kapulungan. Apan giklaro ni Sotto nga mibalibad si Legarda sa maong tanyag ug miingon nga dili siya interesado sa maong posisyon.
Gipasalig usab ni Sotto nga nagpabiling “solid” ang tibuok majority bloc luyo sa maong mga taho.
Sa pikas bahin, gihulagway ni Senate President Pro Tempore Panfilo “Ping” Lacson nga “malisiyoso ug sadista” ang mga istorya nga naglambigit kang Legarda sa giingong plano nga ilisan ang kasamtangang liderato sa Senado. Matud ni Lacson, human mibalibad si Legarda sa tanyag, adunay mga naggama og bakak nga balita nga ang senadora kono ang miboluntaryo sa pagpangita og suporta alang sa bag-ong Senate majority.