Gipakita sa inisyal nga imbestigasyon sa kapulisan nga personal nga problema sa relasyon ug kasinatian sa eskwelahan ang posibleng nagtulod sa estudyante sa Central Mindanao University (CMU) sa paghunos sa iyang kinabuhi pinaagi sa labing makalilisang nga paagi mao ang pagsunog sa kaugalingon.
Gikumpirma ni Police Major Jayvee Babaan, tagpamaba sa Bukidnon Police Provincial Office (PPO), nga wala silay nakitang timailhan sa pagpanamastamas o kalapasan sa balaod nga nalambigit sa insidente. Gisuportahan kini sa CCTV footage, ebidensya, ug pahayag sa mga saksi, nga nagpakita nga depresyon ug emosyonal nga kabug-aton ang nanguna nga anggulo sa imbestigasyon.
Sa laing bahin, gipalig-on usab ni Police Executive Master Sergeant (PEMS) Ken Hanzel Bughaw, tagpamaba sa Malaybalay City Police Station, ang resulta sa Bukidnon PPO. Matud pa niya, klaro sa ebidensya nga personal nga desisyon sa biktima ang insidente ug wala kini naglakip og kriminal nga lihok.
Kagahapong adlawa, July, 24, 2025, miabot sa Villanueva Funeral Homes ang amahan sa biktima. Dili madawat sa amahan ang nahitabong kamatayon sa iyang anak, hinungdan nga iyang gitinguha nga ipa-autopsy ang patay’ng lawas aron masuta kon adunay ebidensya sa krimen o pagpanamastamas nga posibleng wala pa matumbok sa inisyal nga imbestigasyon.