Napakyas ang Golden State Warriors sa pagdaug sa ikaduhang duwa sa ilang back-to-back games human sila mapilde sa Portland Trail Blazers, sa iskor nga 139–119, nga adunay 20 puntos nga biya.
Bisan pa sa 35 puntos ug 6 ka rebounds nga nahimo sa NBA star nga si Stephen Curry, dili kini igo aron maluwas ang team tungod sa kusgan nga performance sa ubang mga players.
Nalimitahan lamang sa 14 puntos si Jimmy Butler, samtang 16 puntos ug 8 rebounds ang namugna sa forward nga si Jonathan Kuminga.
Sa pikas bahin, walo ka players sa Blazers ang nakabuhat og double-digit scores, gipangulohan ni Deni Avdija nga nakascore og 26 puntos, 5 rebounds, ug 6 assists.
Nagsugod ang mainiton nga duwa sa una nga quarter, apan mikusog ang opensa sa Portland sa ikaduhang quarter diin nakabuhat kini og 41 puntos ug nakapahamtang sa 13-point deficit sa Warriors sa pagtapos sa first half.
Wala makabawi ang Warriors sa second half ug midako pa ang kalahi-an hangtod 20 puntos sa pagtapos sa duwa.
Sa tibuok duwa, 66 puntos sa paint area ang nakuha sa Portland samtang 30 puntos ra ang natubag sa Warriors.
Kini ang una nga kapildihan sa Warriors samtang duha na nga kadaugan ang natala sa Portland Trail Blazers.