Posible nga hinay-hinay nang makita ang kabag-ohan sa political alignment sa pipila ka mga mambabalaod, human sa deklarasyon ni Vice President Sara Duterte nga modagan siya sa pagka-presidente sa 2028 elections.
Sumala ni Caloocan Rep. Edgar Erice, gisiguro niini nga adunay kabag-ohan sa pipila ka alyansa sa mga mambabalaod, labi na kung hisgutan ug pagadesisyunan na ang impeachment complaint batok kang VP Sara.
Bisan pa niini, gituohan ni Erice nga ang desisyon sa mga mambabalaod bahin sa reklamo batok sa Bise Presidente magdepende gihapon sa kung giunsa pagdepensa sa iyang kampo ang mga alegasyon nga sulod sa mga reklamo.
Sa pagkakaron, ang Bise Presidente nag-atubang sa upat ka impeachment complaint nga gisang-at sa lain-laing adlaw.
Sumala ni Erice, bisan pa man nga posibleng giisip sa kampo sa Bise Presidente nga strategic ang ilang sayong deklarasyon, daghan pa gihapon ang mag-usab sulod sa duha ka tuig o sa dili pa moabot ang 2028 elections.
Sa laing bahin, sukad sa deklarasyon ni VP Sara nga modagan sa pagka-presidente sa umaabot nga eleksyon, nagsugod na usab ang iyang kampo sa pag-organisar sa lain-laing support groups.
Usa niini mao ang Masa-Sara Duterte Alliance (MASADA), usa ka nationwide campaign nga nag-awhag sa kapin sa 32 milyong Pilipino nga suportahan pag-usab ang Bise Presidente sa iyang ikaduhang pagdagan.