Mokabat sa kapin ₱92 milyon nga kantidad sa smuggled nga sigarilyo ug ilegal nga droga ang nasakmit sa Philippine National Police (PNP) sa managlahing operasyon niadtong Abril 2 hangtod 3, 2026.
Sa Maguindanao del Norte ug Misamis Oriental, narekober sa mga otoridad ang ginatos ka mga master cases sa smuggled nga sigarilyo nga gibana-banang nagkantidad og sobra ₱69.9 milyon.
Samtang sa Quezon Province, usa ka mananagat ang nakakita sa gibana-banaang 3,280 gramos nga gidudahang shabu nga nagkantidad og kapin ₱22.3 milyon.
Gidayeg ni PNP Chief, Police General Jose Melencio Nartatez Jr., ang maong kalampusan ug gipaniguro ang mas gipahugtan pa nga kampanya batok sa smuggling ug ilegal nga droga ubos sa “Bagong PNP.”
Padayon usab ang panawagan sa kapulisan alang sa kooperasyon sa publiko aron mapabilin ang kahapsay ug kaluwasan sa tibuok nasud.