Mibarog ang Philippine National Police (PNP) nga miagi sa saktong pamaagi ug legal nga proseso ang gihimong pagkumpiska sa mga luxury cars nga gipanag-iyahan ni kanhi Ako Bicol Partylist Rep. Zaldy Co.
Sumala ni Acting PNP Chief PLtGen. Jose Melencio Nartatez Jr., gisunod sa mga awtoridad ang tanang balaod aron masiguro nga ang operasyon adunay transparency, pagrespeto sa due process, ug pagtagad sa katungod sa mga nalambigit.
Kini isip tubag sa pamahayag sa kampo ni Co nga nagkuwestiyon sa legalidad sa maong lakang. Gikumpirma sa kapulisan nga ang operasyon gipatuman base sa mando gikan sa mga awtoridad.
Lakip sa mga nasakmit nga mahalong sakyanan sa kanhi mambabalaod mao ang mga high-end models sama sa Rolls-Royce, Toyota Sequoia, Cadillac Escalade, ug Lexus. Matud ni Nartatez, kabahin kini sa paningkamot sa kagamhanan batok sa korapsyon, ilabi na sa isyu sa mga flood control projects.
Gipasalig usab sa hepe nga magpabiling aktibo ang PNP sa pagpangita ug pagdakop sa tanang personalidad nga nalambigit sa maong anomaliya sa flood control scandal.