Gipaniguro sa Philippine National Police kon PNP nga padayon nilang ipatuman ang seguridad ug monitoring sa mga gasoline stations sa tibuok nasud human sa pahimangno gikan sa Department of Energy kon DOE batok sa posibleng hoarding ug pagtaas sa presyo sa mga produktong petrolyo.
Matud ni PNP Spokesperson ug Public Information Office Chief PBGen. Randulf Tuaño, ang tanang kapulisan, lakip ang Criminal Investigation and Detection Group, PNP Maritime Group, ug Highway Patrol Group, gimandoan nga ilakip ang mga gasolinahan sa routine patrols ug inspections aron masiguro ang pagsunod sa DOE pricing directives.
Gipahimangnoan usab sa PNP, ang mga establishments nga masakpan nga magtago sa fuel supply aron mamahimong taas ang presyo posibleng arestohon ug posibleng pasakaan og kaso subay sa balaod.
Samtang ang publiko gi-awhag sa pag-report sa mga suspetsadong hoarding o profiteering pinaagi sa 911 o sa DOE online channels.