Nanawagan karon ang Philippine National Police-Criminal Investigation and Detection Group (PNP-CIDG) ngadto sa negosyante nga si Charlie “Atong” Ang nga musurender sa mga otoridad human gipagawas ang duha ka warrant of arrest batok kaniya.
Gibutyag ni CIDG Director, Police Major General Robert Alexander Morico II, nga kasamtangang gipahigayon ang lapad nga manhunt operations sa mga dapit nga giingong nahimutangan ni Ang sa Pasig, Mandaluyong ug Laguna.
Matud ni Morico, mas maayo nga personal nang mutahan si Ang aron maatubang ang iyang mga kaso sa legal nga paagi ug malikayan ang dugang tensyon sa nagpadayong operasyon.
Gipasiugda sa hepe nga kini subay sa mando ni Acting PNP Chief Lt. Gen. Jose Melencio Nartatez Jr. nga ipatuman ang balaod.
Dugang pa, mibahad ang CIDG nga dili sila magduhaduha sa pagdakop sa bisan kinsa nga musulay sa pagbabag sa ilang operasyon. Pasakaan og kasong Obstruction of Justice ang kinsa mang muprotekta o mutago sa negosyante, lakip na ang mga security guards o mga abogado niini.