Gipang-ibot sa mga otoridad ang pipila ka punoan sa gituohang marijuana sa Zone 6, Barangay Capitan Bayong, Impasugong, Bukidnon niadtong Abril 3, 2026.
Sumala sa report ni PCOL OLIVER SOTTO NAVALES, Provincial Director sa Bukidnon PPO, nagsugod ang operasyon human nakadawat og tawag ang kapulisan gikan sa usa ka Barangay Kagawad sa maong dapit.
Gidala pa mismo sa maong opisyal ang usa ka punoan sa marijuana nga nakatanom sa usa ka asul nga sudlanan ngadto sa buhatan sa kapulisan.
Tungod niini, daling gilusad ang usa ka Anti-Illegal Drugs Operation ubos sa pagpanguna ni PMAJ DOMINADOR V ORATE JR. Miresulta kini sa pagka-ibot sa upat (4) pa ka punoan sa hingkod na nga marijuana nga nagkantidad og Php 800.00 base sa standard drug price.
Gisaksihan sa media ug mga opisyal sa barangay ang gihimong imbentaryo sa dapit. Sa pagkakaron, gidala na ang mga ebidensya sa Provincial Forensic Unit alang sa eksaminasyon, samtang padayon ang pag-ila sa mga suspek aron pasakaan og tukmang kaso sa Malaybalay City.