Gibutyag sa usa ka ekonomista nga gisakyan sa mga kompanya sa lana ug mga istasyon sa gasolina ang pagpasaka sa presyo, bisan pa kon ang maong suplay naggikan pa sa mga old stocks o buffer stocks.
Sumala ni Ray Talimio Jr., kanhi pangulo sa Oro Chamber ug sakop sa Economic Development Committee sa RDC-X, makita nga aduna pay igong suplay nga naggikan sa karaan nga presyo apan misabay matud pa kini sa pagsaka sa internsyunal nga presyo sa produktong petrolyo.
Gipasabot niini nga kon ang buffer stock sa mga kompanya moabot og 15 ka adlaw, ug anaa pa kita sa ika-pito nga adlaw gikan sa pag-abot sa suplay, nagpasabot kini nga ang gibaligya nga lana mapalit pa sa karaan ug mas barato nga presyo.
Gidugang pa sa ekonomista nga dili pa angay ang kalit ang pagsaka sa presyo sa lana karong panahona.
Sumala ni Talimio, ang kasamtangang “buffer stock” o reserba sa mga negosyante napalit pa sa karaan ug mas barato nga presyo.
Gipasabot niya nga ang epekto sa pagsaka sa presyo sa kalibutanong merkado angay pa nga mabatyagan human sa duha hangtod tulo pa ka mga kargamento o “shipments” nga moabot sa nasud.
Sa pikas bahin, gibasol niini ang DOE, gumikan sa pagpasiugda og pagpasaka sa presyo sa tukmang panahon.
Gibug-atan niini nga gilaumang mas ubos pa ang preyuhan sa lana, kung ibase sa adlaw nga angay na kining ipatuman sumala sa mando sa presidente.