Nag-adjust sa kabugnaw nga klima sa Malaybalay, Bukidnon ang pipila ka atleta gikan sa Iligan City samtang nagpadayon ang ilang pagpangandam alang sa NMRAA 2026 nga opisyal nga magsugod karong Marso 19.
Sumala ni Coach Justin Navidad, kapin 900 ka delegado gikan sa Iligan lakip ang 57 ka atleta sa athletics ang miabot sayo sa buntag ug nakahuman na sa ilang training. Gibutyag nga adunay ginagmay nga problema sa tubig sa ilang billeting quarters apan nasulbad kini pinaagi sa suplay nga gihatud sa firetruck, samtang ang pagkaon ginahatag sa ilang division. Nadugang pa nga adunay pipila ka atleta nga nagkaubo ug nag-adjust sa klima.
Sa laing bahin, si Coach Joseph Cinco sa arnis team mibutyag nga adunay 16 ka atleta nga padayon pa sa ilang training ug nalingaw sa bugnaw nga panahon bisan adunay gamay nga adjustment sa panglawas. Nagpasalamat usab kini sa padayon nga suplay sa tubig gikan sa gobyerno.
Nagpadayon ang pagpangandam sa mga delegado aron masiguro ang maayong partisipasyon sa NMRAA 2026 dinhi sa Bukidnon.