Mainitong gisugat sa mga tumatan-aw sa Rizal Memorial Sports Complex ang Pinay tennis sensation nga si Alex Eala sa iyang mga dula para sa Philippine Women’s Open.Hapit mahurot ang mga tiket tungod sa kadaghan sa mga fans nga gustong makakita sa 20-anyos nga tennis star sa Pilipinas.
Sa pakighinabi sa Bombo Radyo sa mga supporters ni Alex, ilang gipahayag nga dalaygon kaayo ang pagka-consistent niini ug ang tibuok kasingkasing nga effort nga iyang gipakita sa matag event.
Gibati usab ni Eala ang garbo, pressure ug pribilehiyo sa pagdala sa dungog sa nasud niining talagsaon nga higayon diin ang tennis maoy nahimong sentro sa atensyon.Bisan pa man og nalangan og kapin sa usa ka oras ang iyang uwahing dula tungod sa kataas sa mga naunang event, nagpabiling madasigon ang iyang pagtratar sa mga tumatan-aw.
Gisunod sa kompetisyon ang temang “Our moment to shine”, nga haom kaayo sa pagsaka ni Eala isip bag-ong nawong sa Philippine tennis.Bisan pa man sa presensya sa ubang mga magduduwa, si Eala gayud ang nag-unang nakakuha og atensyon nga giatngan sa publiko.
Ang iyang pag-apil dili lang usa ka dula sa tennis court, kundi usa usab ka pagpakita sa dedikasyon ug inspirasyon para sa mga Pilipino nga nagtuo sa katakos sa kabatan-onan sa tibuok kalibutan.Naglaum usab ang Tennis Association nga makatabang kini sa pagpalig-on sa maong dula sa mga kabatan-unang pinoy.