Nakakuha karon og atensyon ang usa ka balay sa Aucallama, Peru tungod sa katingalahang gidak-on niini, diin adunay gilapdon nga 63 sentimetro (24 pulgada), nga posible nga mahimong pinakahoot nga balay sa tibuok kalibutan.
Gidisenyo ug gimugna kini sa lokal nga residente nga si Fabio Moreno, ug ang tumong sa daghang color nga balay mao ang pagpamatuod nga ang kalipay dili basi sa kadako sa luna, kondili sa unsaon kini paggamit.
Bisan pa sa kagamay sa espasyo, kompleto kini sa mga pasilidad sa usa ka modernong panimalay.
Sulod sa balay makita ang cr, kusina, dining room, kwarto, study area, labhanan, ug adunay duha ka hagdanan nga nagkonektar sa duha ka andana niini.
Makit-an ang balay tupad mismo sa main square sa Aucallama ug abli kini alang sa mga turista nga gustong mosulod.
Apan, tungod sa kapiot dili makasulod ang duha o daghan pa nga tawo nga dungan, mao nga kinahanglan usa-usa ka tawo lamang ang mosulod.
Subay niini, nakapasa na si Moreno og aplikasyon sa Guinness World Records alang sa opisyal nga titulo.
Bisan pa nga naghulat pa sa makuting beripikasyon ug opisyal nga pagsukod sa mga eksperto, kumpiyansa siya nga makuha niya ang maong world record.