Usa ka talagsaon nga katingalahan sa inhenyeriya (engineering marvel) ang makit-an sa Guangzhou CTF Financial Centre human kini giila nga puy-anan sa pinakapaspas nga elevator sa tibuok kalibutan.
Gihimo sa kompanyang Hitachi, ang maong elevator makakab-ot sa gikusgon nga 1,200 metros matag minuto (o gibana-bana nga 72 kilometros matag oras). Tungod sa sobra niini nga kapaspas, makadala kini og mga pasahero gikan sa ground floor hangtod sa ika-95 nga andana (floor) sulod lamang sa 43 ka segundo.
Nalupig niini ang kanhi record holder nga anaa sa Taipei 101. Apan sumala sa Hitachi, ang ilang prayoridad dili lang ang kapaspas kondili lakip na ang kaluwasan (safety) sa mga mosakay.
Gigamit nila ang mga gitawag nga “aerodynamic capsules” aron maminusan ang pagsukol sa hangin (wind resistance), ug duna usab kini mga espesyal nga brake nga makasugakod sa grabeng kainit kon ugaling duna’y mahitabong deperensya.
Aron dili magsakit ang dunggan sa mga pasahero tungod sa paspas nga pagsaka ug pagbag-o sa pressure sa hangin, ang mga elevator car kay “pressurized” ug duna’y “automated system” nga mo-adjust sa air pressure. Gawas pa niini, duna usab kini “active guide rollers” nga mokuha sa bisan unsang pagkurog (vibration) aron magpabiling hapsay ug swabe ang biyahe bisan pa man sa kapaspas niini.