Kapin sa duha ka dekada na ang milabay, apan nagpabilin gihapon nga walay makalabaw sa Guinness World Record ni Tom Wiberg gikan sa Sweden human niya namugna ang kinagamyan nga motorsiklo sa tibuok kalibutan.
Ang maong sakyanan, ginganlan og “Smalltoe” diin gihimo niadtong 2003.
Gumikan sa sobra niini ka gamay, igo ra gayod kini nga kahuptan sa palad sa usa ka tawo.
Kini adunay gitas-on sa lingkoranan nga 65 mm lamang ug motimbang og 1.1 ka kilo, apan katingad-an nga kini tinuod nga madala ug masakyan.
Pinaagi sa tabang sa espesyal nga sapatos nga adunay mga attachments, malampusong namaneho ni Wiberg ang motor sa gilay-on nga kapin sa 10 metros.
Ang gamay nga makina niini adunay kusog nga 0.3 hp ug makadagan sa kapaspas nga duha ka kilometro matag oras.
Tungod sa talagsaong disenyo niini, nalabwan ni Wiberg ang kanhing rekord niadtong 1990 nga gihuptan sa mga tigmugna gikan sa United Kingdom.
Matud sa Guinness, ang bisan kinsa nga gustong mupilde niini karon kinahanglan makahimo og butang nga mas gamay pa sa dulaan apan makasugakod sa gibug-aton sa tawo.