Nagpabiling walay nakalupig sa Guinness World Record ni Tom Wiberg gikan sa Sweden human niya namugna ang “Smalltoe,” ang giila nga pinakagamay nga motorsiklo sa tibuok kalibutan.
Sukad niadtong tuig 2003, wala pay laing makina nga nakalabaw sa kagamay niini nga mokasya lamang sa palad sa tawo.
Ang Smalltoe adunay wheelbase nga 80 mm (3.14 inches) ug gitas-on sa lingkoranan nga 65 mm (2.55 inches).
Bisan pa man sa talagsaon niining gidak-on, katingalahan nga kini tinuod nga moandar ug mahimong sakyan sa usa ka hamtong.
Kini nga motorsiklo adunay timbang nga 1.1 ka kilo ug nasangkapan og gagmayng ligid nga adunay diametro nga 16 mm sa unahan ug 22 mm sa luyo.
Gigamitan kini og makina nga adunay gahum nga 0.22 kW (0.3 hp) ug makaabot sa gikusgon nga duha ka kilometro matag oras.
Aron mapadagan ang Smalltoe, migamit si Wiberg og espesyal nga sapatos nga adunay mga attachment aron malampuson niya kining namaneho sa gilay-on nga kapin 10 metros, nga maoy gikinahanglan aron makuha ang opisyal nga titulo.
Pinaagi niini nga kalampusan, napildi ni Wiberg ang kanhing rekord niadtong 1990 nga nakuha nila ni Simon Timperley ug Clive Williams gikan sa UK.